[平民食堂系列] 作為一個稱職嘅月光族，月尾個銀包乾晒塘亦都係好合理嘅！但作為一個能屈能伸嘅香港人，點可以因為銀包嘅乾涸而要去hea食！所以今日就介紹番間較為平穩嘅餐廳啦！ （我知你實話都成50幾蚊，咁都算平民？ ）係嘅係嘅，但你睇吓香港依家通脹壓力咁勁，係市區用50幾蚊食個海南雞飯，其實都唔算好貴嘅！起碼一定平過小西灣街市隻I-chicken囉！
講返正題，碟海南雞嚟到嘅時候，嘩！甩皮甩骨咁！（講明先啊！我唔係話佢好核突！不過唔靚囉！ ）又係嗰句，我唔係相機唔係食個賣相！我係真係食落肚架嘛！一啖咬落去，其實我都唔係好識分究竟佢係雞髀定雞胸，因為啲雞胸又出奇地都算滑喎！而且啲雞真係有雞味架！ （我知你實想話呢一句好廢啦！但係你需要知道依家好多雞真係冇雞味架，食落去都唔知食緊乜咁！）而且個配合嗰個秘製醬汁，真係幾好食！個醬汁唔似平時嘅海南雞飯鋪頭嗰啲甜甜地嘅豉油或者姜蓉，而係一啲類似泰式酸辣鳳爪汁既物體！真係我都唔識點形容啊！總之你自己去試吓啦，一定唔會令你失望！
至於個飯底呢，就係普通嘅油飯！係香嘅，不過冇乜特別囉！老老實實，雖然我擁有模特兒嘅標準身形，但係呢一個海南雞飯好似真係太細碟，食咗好似無食咁，唔多夠飽囉！仲有啊！提提你間餐廳可以加＄10將個海南雞轉雞脾，但係我就唔建議你加錢喇，反正其實雞胸同雞髀嘅分別都唔係好大！無謂嘥錢啦！
泰妃雞
灣仔三角街3號地下
旺角豉油街74號地舖
上環禧利街17-19號地下
Search